‘Mission Shakti’ a hlawhtling

India chuan anti-satellite, A-SAT hmangin low earth orbit satellite chu kap thlain, anti-satellite weapon test thei ram pathum US, Russia leh China te chu a zawm ve thei ta.

Prime Minister Narendra Modi chuan anti-satellite missile test, Mission Shakti tia sawi chu hlawhtling taka neih a nih thu sawiin, A-SAT missile hian Low Earth Orbit satellite hi kahchhuah a nih aṭanga minute thum chhung lekin a kapthla thei a ni, a ti. Hei hi India tana thil ropui tak, India ram mipuite tana thil chhuanawm tak a nih thu a sawi. Khawmual leh tuipui chauh ni loin, boruak lam thleng pawhin venhim a ni thei tawh dawn a ni tiin, he thil a hlawhtlinna atana tha thawhtu scientist-te zawng zawng chu a lawmpui thu a sawi.

Hetihlai hian eptu pawl hrang hrangte chuan model code of conduct hman a nih tawh hnua sorkar lam aṭanga hetiang puanchhuah a ni hi dan kalh niin an sawisel a, ṭhenkhat chu Election Commission-ah pawh an zualko nghal a ni. Mahse EC chuan security kaihhnawih thil puannaah chuan poll panel phalna lak kher a ngai lo niin a lo hrilh a ni.