EC-in PM Modi-a thusawi chhuichiangtu tur committee din

Election Commission chuan Nilaini-a Prime Minister Narendra Modi-an TV-a thu a sawi chu Lok Sabha inthlanpui neih hun tur puan a nih tawh avangin Model Code of Conduct a bawhchhia em tih chungchang chhui chiangtu tur committee a din nghal.

EC thupuangtu chuan poll panel hian committee hnenah hian PM thusawite chu rang taka zirchiang a, model code of conduct a palzut em tih chhui tura a hriattir thu a sawi.

PM Modi hian Nilaini khan Cabinet Committee on Security meeting zawh hnuah ram pum huap tana thusawina hun hi hmangin, India-in anti-satellite missile enchhinna, Mission Shakti tih chu hlawhtling taka neih a nih thu leh, A-SAT missile hian Low Earth Orbit satellite hi kahchhuah a nih aṭanga minute thum chhung lekin a kapthla thei tih sawiin hei hi India leh a ram mipuite tana thil chhuanawm tak a nih thu a sawi. India chu ram tlemte chauh awmna space superpower zingah a tel ve thei ta tih a sawi a ni.

Mahse eptute chuan Model Code of Conduct hman a nih tawh hnuah PM Modi hian sorkar hnathawh leh a fakna lam thute sawiin, hei hi dan bawhchhiatna a ni, an ti. EC hian national security leh disaster management nena inkaihhnawih thilte chu model code hian a huam tel lo tih a sawi a, mahse PM thusawi hi security kaihhnawih thil a ni lo tiin eptute chuan an sawi a ni. Model code hman a nih tawh avangin Mission Shakti hlawhtling taka neih a nih chungchang chu PM ni loin scientist-te zawk chuan an puang tawh mai tur a ni, an ti.

Modi thusawi chungchang chhui chiang tura ruat committee hi Deputy Election Commissioner in charge of the Model Code of Conduct (MCC) Division Sandeep Saxena-an a ho dawn a, member atan Dhirendra Ojha, DG Media; K F Wilfred, Sr. Principal Secretary (Law); leh N N Butolia, Principal Secretary (MCC)-te ruat an ni bawk. Panel hi a rang thei anga report thehlut tura hriattir an ni.