Congress party-in ṭul a tih chuan ka chuh ve ang : Priyanka

Congress hruaitu Priyanka Gandhi Vadra chuan an party-in ṭul a tih a, a ngen a nih chuan Lok Sabha inthlanah a chuh ve dawn tih a sawi. Hemi rual hian amah chuan a party organisation tana theihtawpa lo thawh chu a duh zawk tih a sawi.

Amethi-a reporter-ten an kawmnaah Priyanka chuan,"Kan party-in min ngen a nih chuan ka in contest ve ngei ang. Mahse ka mimal duhdah chuan party orginasation tan hian thawh tur a tam avangin he lama inpek hi ka duh rih a ni", a ti. Party worker-te chu inthlan campaign ṭha taka kalpui chu a pawimawh thute a hrilh thu leh, in tin tlawhkula mipuite hennah he inthlan hi ram chhanhimna tur hun a nih thute hrilh tur te, Rahul Gandhi ni loin ramin hnehna a chan a ngaih thute hrilh tura a fuih thu a sawi.

Congress general secretary hian Nilaini aṭang khan a campaign thawh hnihna hi Uttar Pradesh khawchhak bialah a ṭan leh a, a nuṭa Rahul Gandhi-a bial Amethtu a tlawh a, vawiin hian Ayodhya a kal leh ang.

Priyanka chuan Congress party-in inthlan campaign-na atana a hman leh a tiam, minimum income scheme chungchanga BJP lamin nasa taka an sawisel chu chhang letin, an party chuan a taka a tihhlawhtlin ngei tur chu a sawi a ni, a ti. Rajasthan leh Madhya Pradesh-ah loneitute loan ba an ngaihdam tur thu an sawi chu, sorkarna an chan aṭanga ni 10 chhungin an tihlawhtling nghal a ni, a ti.

BJP-in Congress sorkarin retheihna a umbo zo lo nia a puhna pawh chhangin, harsatna zawng zawng chu chinfel a la ni lo tih an pawm tih a sawi a, mi eng emaw zat chu dinhmun rethei takin an an la awm mek a, heng mite harsatna sukiang vek tur hian tih tur tam tak a la awm a ni, a ti. Loneitu, harsatna nasa tak tawk te tan theihtawp an chhuah tih sawiin, heng mite hian sorkar aṭangin puihna an dawng lo a, thlai chi leh leiṭha te a hunah an dawng thei lo tihte an sawi tih sawiin, hmun ṭhenkhatah phei chuan an thlai thar aiin thlai chi mante a to zawk a ni, a ti. Leiba neiin an awm mek a, mahse thuneitute lam aṭangin puihna an dawng si lo a ni, a ti. BJP sorkar chuan hna tam tak siam a tiam chungin a tihlawhtling lo a, ṭhalai sang tam tak hna nei loin an awm mek a ni, tiin Congress hruaitu chuan a sawi.