India-in a tarlan hmun 22-ah firfiak camp awm lo : Pakistan

Pakistan chuan Jammu and Kashmir-a Pulwama hmuna Jaish-e-Mohammed (JeM) firfiakin pawikhawihna a thlen hnua India-in firfiakte inkhuarna hmun nia a sawia a hriattir hmun 22-ah chuan eng firfiak camp mah a awm lo niin a sawi.

Pakistan Foreign Office (FO) chuan thuchhuah siamin, India-in a chhinchhiah hmun 22-te hi an enfiah hnuah eng camp mah a awm lo a, heng hmunte hian an tlawha an enfiah duh a chuan an phalsak tih a sawi bawk. Hemi rual hian mi 54 hren mekte pawh chhui zui an ni a, Pulwama pawikhawihna thleng nen hian inzawmna an neihna hriat a ni lo, a ti.

February 14-a Pulwama-a CRPF convoy beihnaa sipai 40 zet an thih hnuah khan India chuan he pawikhawihnaa JeM firfiak pawl inrawlh dan leh, Pakistan ram chhunga camp an neihna hrang hrang tarlanna chu New Delhi-a Pakistan Acting High Commissioner hnenah February 27 khan a pe a ni. Pakistan chuan an document dawnte hi uluk taka an zirchian thu leh, mi eng emaw zat thu zawhfiah tura an hren thu a sawi. India document pek hi phek 91-a chhah niin, part 6-ah ṭhen a ni a, part 2 leh 3-ah hian Pulwama beih chungchang hi tarlan a ni.