PM-in hri kai tamna state CM-te meeting neihpui; Hri kai thar nuai thum chuang awm belh leh

Prime minister Narendra Modi chuan nimin khan Covid-19 hri kai tamna state chief minister-te chu video conference kaltlangin meeting a neihpui.

PM hoa meeting neihah hian Maharashtra, Uttar Pradesh, Kerala, Chhattisgarh, Madhya Pradesh leh Delhi CM-te pawh an tel. Hri leng mek chungchanga an state dinhmun te, hma lak dan leh an mamawhte an sawiho a ni.

Ningani khan India ramah khawvela ni khata hri kai tam ber ni a thleng nawn leh a, mi 3,32,730 in hri an kai thar. Hemi ni vek hian hripui vanga thi mi 2,263 awm bawkin, hei pawh hi ni khata India rama Covid-19 vanga thi an tam ber ni a ni.

Hri kai mek, active case pawh an pung chak tawh hle a, hri kai hmuh chhuah tawh aṭanga 14.93% an ni tawh. Hri kai enkawl dam, recovery rate chu a tlahniam zel a, 83.92% niin thihpui zat, fatality rate chu 1.15% a ni bawk.

Oxygen indaih loh vangin Delhi-ah mi 25 thi
Delhi-a Sir Ganga Ram Hospital-ah Covid-19 hri kaite enkawlna tur oxygen indaih lohna vangin Ningani khan mi 25 aia tlem loin nunna an chan phah tawh a, mi 60 vel dinhmun derthawng takah an awm mek.

Hri kai mi 25-te thih chhan hi 'low-pressure oxygen' nia sawi a ni. Hospital official chuan oxygen stock sa, darkar 2 daih bak an nei lo a, ventilator leh BiPAP machine ten hna an thawh ṭhat theihloh avanga an mangan thu an sawi. Damlo 60 te chu dinhmun ngaihtuahawm takah dingin, Health Minister hnenah oxygen pek belh tura an dil hnuah oxygen tankers-te chuan Sir Ganga Ram hospital hman tur an pe.

He damdawi-inah hian Covid-19 hri kai enkawl lai 500 chuang awmin, an zinga 150 te chuan oxygen an mamawh reng a ni.

Delhi-a private damdawi-in ṭhahnem takin ni li liam ta aṭang khan oxygen supply lamah harsatna an tawk nasa hle a, an damdawi-ina hri kai enkawlte chu healthcare facility danga sawn mai turin Delhi sorkar pawh an ngen hial.

Deputy chief minister Manish Sisodia chuan union health minister Harsh Vardhan hnena lehkha a thawnna ah Ningani tlai aṭang khan private damdawi-in paruk chuan oxygen supply an neih tawh loh thu a thlen.