Maharashtra-a Covid-19 Hospital kangah mi 13 thi

Maharashtra-a Palgar district-a Covid-19 Hospital-ah Zirtawpni zing khan kangmei a chhuak a, hri kai enkawl lai mi 13 an thi.

Kangmei chhuahna hmun hi Virar West-a Vijay Vallabh Covid Care Hospital ICU-a ni. He damdawi-inah hian hri kai enkawl lai eng emaw zat an awm.

Dam lote hi damdawi-in hnai berah sawnchhuah vek niin, kangmei chhuaka thite hi an taksa a kanchhiat hneh em avangin nimin tlai thleng khan thi te nihna hi puanzar theih a la ni lo.

Maharashtra chief minister Uddhav Thackeray chuan Vijay Vallabh COVID Care Hospital-a kangmei chhuah chhan chhui chiang turin a ti nghal a ni."Thil thleng lian tak a ni. A mawhphurtu chu zuah an ni lo ang. Thi chhungte hnenah sorkarin zangnadawmnan cheng nuai nga ṭheuh a pe ang, " tiin Maharastra minister Eknath Shinde chuan a sawi.

Prime minister Narendra Modi leh defence minister Rajnath Singh chuan Maharashtra damdawi-in chhiatna thleng chu pawi an ti takzet tih sawiin, PM Modi chuan thi chhungte a tawrhpui thu leh, hliam tuarte pawh an dam leh thuai a duhsak thu a sawi a ni.