India ram aṭanga luh khap ram pung zel

Canada chuan India leh Pakistan aṭanga khualzin phur thlawhtheihna luh a khap.

He khapna thupek hi Ningani khan Canada transportation minister Omar Alghabra chuan puangin, ram pahnih aṭanga khualzin lutte zingah hri kai hmuh chhuah an pun zel avangin ni 30 chhung an luh khap a ni tih a sawi. Khapna thupek hian bungraw phur thlawhtheihna te a huam tel lo.

Health minister chuan ram dang aṭanga lut khualzin, hri kai hmuh chhuah zinga 50% chuang chu India aṭang kal an ni tih a sawi.

UAE pawhin Pathianni aṭangin ni 10 chhung chu India ram aṭanga khualzin phur thlawhtheihna luh a khap dawn bawk. Pathianni aṭanga chhiara ni 14 liam ta chhunga India rama kalte chu, ram dang aṭang pawhin UAE-ah hian luh khap a ni dawn bawk. He khapna thupek hi ni 10 hnuah ennawn a ni dawn tih thuneitute chuan an sawi.

Indonesia pawhin ram dang mi, nimin aṭanga chhiara ni 14 liam ta chhunga India rama kalte hnenah visa a pe chhuak dawn rih lo. Indonesia mi, India rama aṭanga haw turte erawh an luh phalsak a ni ang a, mahse inkhung hrang tura tih an ni thung.

US-in India rama zin lo turin an mite chah
US chuan an ram mi leh sate chu Covid-19 hri leng a hluar leh avangin India ramah zin lo turin a chah. India bakah Pakistan, Bangladesh, Afghanistan leh Maldives ramte tlawh rih lo turin a ti.

Centers for Disease Control and Prevention (CDC) chuan Covid-19 vaccine dose la kim tawh pawh India ramah zin rih lo turin a ti a, vaccine lak hnuah pawh India rama Covid-19 hri chi hrang hmuhte chu kai thei dinhmunah an la ding tih a sawi.