Modi-a campaign auhla hman vangin Railways-in sawisel tawk

Indian Railways chuan Prime Minister Narendra Modi thlalak chuanna chu Model Code of Conduct hman a nih hnuah pawh a la pekchhuah chhunzawm zel avangin Election Commission of India chuan hriattirna a lo pe tawh a, insawifiah turin a ti. Hemi hnu hian Railways thingpui no atana hman, paper cup-ah Modi-a campaing auhla, "main bhi chowkidaar" ('I'm also watchman') tih ziahna a hman avangin sawisel a tawk leh.

Kathgodam Shatbadi rela khualzin pakhat chuan rel-a thingpui semna atan no an hman thlalak hi a twitter-ah a tarlang a, khualzin dangte pawhin hetiang no hi pek an nih tih pawh an sawi tel bawk. He thil hi Model Code of Conduct palzutna a ni tiin khualzinte hiana an complain nghal a ni. Thlalak hi a darh nasa hle a, Railways pawhin sawisel a tawk nasa hman hle.

Paper cup thlalak thehdarh a nih hnu hian Railways chuan no hi hman chhunzawm a nih tawh loh thu leh, contractor pawh hrem a nih thu a sawi. He no hmang hian thingpui hi ṭum hnih chiah sem a ni tih a sawi bawk.

Indian Railways Catering and Tourism Corporation (IRCTC) thupuangtu chuan 'main bhi chowkidar' tih thu ziahna paper cup hman a nih chungchang hi chhui chian nghal a ni thu sawiin, hei hi IRCTC phalna nei loa hman a ni, a ti. He no hman a nih chungchangah hian supevisor/pantry incharge chu insawifiah tura koh an ni tih a sawi. Hei bakah hian service provider pawh cheng nuai khat chawi tura hriattir a ni bawk tih a sawi.