Hri leng donaah state-tin theihtawpa puih an ni: PM

Prime minister Narendra Modi chuan nimin khan thla tina radio programme a neih ṭhin, Mann Ki Baat ṭum 76-na hun hmang lehin ram chhunga Covid-19 hri leng mek chungchang a sawi.

PM chuan hri leng dona kawngah sorkar laipui chuan a theihtawpin state hrang hrangte a pui tih a sawi a, hri leng thawh hnihna thleng mekah field hrang hrang- pharma industry, oxygen production lama mithiamte pawh meeting a neihpui thu a sawi a ni.

Ram chhunga hri kai nasa taka an pun chhoh leh avangin state tam taka damdawi-inah hri kai na zualte enkawlna tur oxygen indailohna a lian chho hle.

Nimina radio-a thu a sawiah, PM Modi chuan India rama coronavirus leng thawh khatna chu hlawhtling taka do let a lo ni tawh a, mahse a thawh hnihna thlipui rawn thleng chuan ram pum a sawi nghing mek a ni, a ti. Hemi rual hian hri leng dona kawnga lungrual taka thawhho a nih thu a sawi a, he hri leng hi do hneh a nih theihna turin mithiamte leh scientist-te thurawn ngaih pawimawh a ṭul thu a sawi bawk.

Modi chuan vaccine lak a pawimawh thu pawh sawilangin, mipuite chu vaccine chungchanga thuthang dik lo awm ṭhin chu awih lo tur leh, buai phah lo turin a chah. A la thei tura bithliah chinte chu vaccine hi la vek turin a ngen bawk a ni.

Hri kai thar nuai 3.49 awm leh
Union home ministry-in a tarlan danin, kar liamta Inrinni khan India ramah Covid-19 hri kai thar mi nuai 2.49 an awm leh a, hemi ni vek hian hripui vanga thi mi 2,767 an awm belh leh bawk.

Ni li chhung a zawnin hri kai thar hi nuai thum chuang leh thihpui 2,000 chuang an awm tawh a, April 15 aṭang khan India ramah nitin hri kai thar hi nuai hnih chuang an awm ziah tawh bawk a ni.

PM CARES Fund hmangin oxygen plant 551 siam dawn
Hri kai pung zel avanga damdawi-in hrang hranga oxygen indaih lohna thleng mek phuhrukna turin PM CARES Fund hmangin Pressure Swing Adsorption (PSA) medical oxygen generation plant 551 siam a ni dawn tih nimin khan Prime Minister's Office chuan a sawi.

PMO chuan oxygen plant 551 siamna tur hi PM CARES Fund chuan a pawmpui tawh a, prime minister Narendra Modi pawhin heng plant-te hi a rang thei anga hman an nih theihna tura hma la nghal turin a hriattir tawh a ni, a ti.

Oxygen plant hi hri leng hluarna state/UT-a district headquarters-a sorkar hospital-ah siam a ni dawn tih sawii, kumin kumtir lam khan PM CARES Fund hian public health facility hrang hrangah PSA medical oxygen generation plant 162 siamna atan cheng vaibelchhe 201.58 a lo dah tawh a ni.