Delhi-ah kar khat chhung lockdown pawtsei
Delhi chief minister Arvind Kejriwal chuan nimin khan Delhi khawpui huam chhunga complete lockdown kalpui mek chu kar khat dang pawtseiin, May 3 thleng a awh ang.
CM Kejriwal chuan Delhi sorkar chuan oxygen siamtu leh suppliers te hnen aṭanga awlsam zawka damdawi-in ten oxygen an dawn theih nan portal thar darkar hnih dan zel update tur a hman ṭan thu a sawi.
Aam Aadmi Party (AAP) hotu chuan Covid-19 hri kai an pun zel avangin khawpuiah damdawi-inah medical oxygen indaihlohna harsatna an tawh thu leh, hei vanga lockdown pawh pawtsei an nih thu a sawi. An harsatna tawhte sutkian a nih theihna atan sorkar laipui leh state sorkar te an thawhdun ṭhat thu a sawi bawk.
Kar kalta Inrinni khan Delhi-ah hri kai thar mi 24,103 awmin, hripui vanga nikhat chhunga thi tam ni ber tawngin, mi 357 an thi. Delhi positivity rate hi 32.27% ni in, hri kai hmuhchuah nuai 10 chuang leh hri vei mek mi 93,080 an awm.
Delhi khawpuiah hian Covid-19 kaihhnawih vanga thi mi 13,898 awmin, ni 12 liam ta chhung ringawt khan mi 2,500 an thih belh a ni. Delhi a containment zone te chu 22,000 aṭangin 24,802 ah tihpun a ni bawk.