Oxygen siam chhuah tipung turin A hmain sorkar laipui kan nawr tawh: Parliamentary panel
Parliamentary panel chuan hripui leng thawh hnihna in ramchhung a rawn nuai hma, nikum November thla khan sorkar laipui hnenah damdawi-ina khum leh oxygen siamchhuahte chu tipung turin rawtna an lo thlen tawh thu a sawi
Samajwadi Party leader Ram Gopal Yadav kaihhruai Parliamentary Standing Committee on Health, chuan damlo te tana oxygen cylinder hman mai theiha a awm theih nan mumal taka a man (rate) bituk turin National Pharmaceutical Pricing Authority (NPPA) a lo hrilh tawh bawk a ni.
Covid-19 hri leng hluar zel karah sorkar damdawi-in khum awm chu a beitham hle a, khum leh ventilator inchan lo an tamzia aṭangin sorkar containment plan siam chuan sawtna a neih loh thu panel chuan a sawi bawk..
"Hri kai an pun zel laiin damdawi-in khum awl chu manganthlak khawpin a tlem a, dam lo tana khum awl awmlo te chu thil pangngai ang maia ngaiin, AIIMS Patna a dam lo khum inchanloa hmuntin maia oxygen cylinder nena an khawsa hmuh chu thil hrehawm tak a ni," tiin panel thuchhuah chuan a tarlang.
Health and Family Welfare secretary chuan nikum October 16 khan NPPA chu oxygen man mumal tak bithliah turin ngenna a thlen tawh bawk.
Tun dinhmunah hian India ramah nitin medical oxygen metric ton 6,900 siamchhuah ziah niin, hman ral tam ber hi 24 - 25 September 2020 inkar kha niin, ni khatah metric ton 3,000 hmang ziah anga chhut a ni.