Ram hrang hrangin India puih tiam
Ram chhunga hri leng thawh hnihna thleng mekah damdawi hrang hrangten oxygen leh hmanraw dang indaih lohna avangin harsatna an tawk mek. Hei vang hian ram hrang hrangin India mamawh chhawk zangkhaina tura puih an tum thu an sawi.
US-in oxygen concentrator ton 5 thawn
US chuan hri kaite enkawlna tura oxygen mamawh indaih lohna sutkian pui turin Pathianni khan India tan oxygen concentrator ton nga a thawn.
Philips oxygen concentrators 318 te hi Pathianni zing khan New York aṭanga rawn thlawh chhuah puiin, nimin khan Delhi airport an rawn thleng. US hian oxygen concentrator a rawn thawn bakah, India rama Covid-19 vaccine siam, Covishield siamna atana hmanraw mamawhte thawn a tum bawk.
Singapore pawhin Pathianni khan India tan oxygen concentrator 250, BIPAP 500 leh medical supply dang a rawn thawn bawk a ni.
Germany-in oxygen leh damdawi thawn dawn
Germany chuan oxygen leh damdawi mamawh te an thawn dawn tih Germany foreign minister Heiko Maas chuan Thawhṭanni khan a sawi.
Mass chuan India-in hripui an do hneh theih nan theihtawp chhuahpui a intiam a, India rama Covid-19 hri leng inthlak danglam ang chu Germany rama a luh ve lohna tura chak taka an chet a ngai tih a sawi bawk. Nimin aṭang khan German mi, India aṭanga hawte chu negative report telloin an ram luhan rem tilo a, negative report nei pawh ni 14 quarantine tur tih an ni. India aṭanga ram dang mi luh chu khap a ni bawk.
Germany foreign ministry chuan sipaite hnenah mobile oxygen siamna hmun leh mamawh ṭul dangte awlsam taka India rama thawnluh a nih theihna tur ngaihtuah turin a chah.
Australia-in oxygen leh ventilator pe dawn
Australia pawhin India ramin hri kaite enkawlna atana a mamawh, oxygen, ventilator leh personal protective equipment (PPE) te a thawn dawn tih a sawi bawk.
Australia health minister Greg Hunt chuan nimin khan India ram mamawh turte an ngaihtuah a, oxygen indaih lohna an tawk mek tih an hriatin thawn an tum tih a sawi. Oxygen bakah ventilator leh PPE te pawh thawn tel a ni dawn a ni, a ti. Hemi rual hian India rama hri leng hluar thar leh avangin India ram aṭangin thlawhtheihna luh khap an tum bawk.
UK leh France pawhin puih tum
UK leh France pawhin India puihna thawn an tum thu an sawi.
UK foreign office chuan oxygen concentrator leh ventilator-te airline container pakua hmangin a thawn dawn tih a sawi. France pawhin oxygen eng emaw zat chu India puihna turin thawn a tum tih a sawi tawh bawk.