State tinah a thlawnin vaccine pe chhunzawm dawn : Harsh Vardhan

Union health minister Harsh Vardhan chuan Covid-19 vaccine chu sorkar laipuiin a quota 50% aṭangin state leh UT hnenah a thlawna a pek chhunzawm zel tur thu Pathianni khan a sawi.

May 1 aṭanga "liberalised and accelerated" policy kalpui tur hmangin, India khua leh tui kum 18 chunglam tan a thlawna vaccine pek vek an nih tur thu leh India sorkar chuan state leh UT te tana an ruahman ṭhin 50% chu a ngai anga a sem tur thu Health Minister hian a sawi a ni.

Harsh Vardhan chuan he thu hi a Twitter-ah tarlangin, political leader te chu dem in thuthar dik lo thehdarh lo turin a chah bawk.

"Natna ṭihbaiawm takin tsunami ang maia min nuai laiin, state sorkar leh private sector kutah thuneihna thui tak pek ve hi kan tihmakmawh a ni," tiin vaccine pekchhuah kawnga khuahkhirhna siam hlip tura nawrtu state sorkarten an nawrna chhan chu a hriatthiam loh thu a sawi bawk. Policy tharah chuan vaccine siamchhuaktu te lakah zalenna thui tak neiin, vaccine tam dan a zirin a man pawh an dawn hniam thei ang.

Ruahmanna thar siamah hian state tinte hnenah a thlawnin sorkar laipui aṭanga vaccine an dawn theih rualin, a siamtute hnen aṭangin sorkar laipui inrawlh loin an lei thei bawk ang.

Minister chuan sorkar laipuiin mimal hnenah direct in vaccine a pe ngai lo a, state kaltlangin ruahmanna fel tak nen an pe ṭhin tih a sawi. Mahse May 1 aṭanga vaccine pek chhuah thawh thumna kalpui turah, vaccine siamtuten an siamchhuah aṭanga 50% chu sorkar laipui hnenah an pe ang a, a bak dose 50% chu state sorkar leh open market-ah pek a ni thung ang.

Kum 18 chunglam hnena vaccine pek tur hi Assam, Uttar Pradesh, Madhya Pradesh, Bihar, Maharastra, Jharkhand, Jammu and kashmir, Tamil Nadu, Himachal Pradesh, Kerala, Chhattisgarh, Haryana, Kerala, Sikkim, West Bengal, Telangana leh Andra Pradesh te chuan a thlawna an pek tur thu an puang tawh