Hri leng hluar leh chhanah Election Commission puh

Madras High Court chuan ram chhunga Covid-19 hri leng a hluar lehna chhanah Election Commission a puh a, thla eng emaw zat aṭang khan ECI chuan polical party hrang hrangten Covid-19 protocol an bawhchhiat chungchangah hma a lak loh avangin tualthah thubuai siamsak hial tlak a ni, a ti.

Nimin khan chief justice Sanjib Banerjee leh justice Senthilkumar awmna first bench chuan hri leng avanga India-in harsatna a tawh leh mekah ECI chu a mawhphurtu awmchhun a ni, an ti. Political party hrang hrangte hnenah court-in Covid-19 protocol zawm tura vawi tam tak thuchhuah a siam chungin, inthlan neihna tura election rally an huaihawt chungchangah ECI chuan engtinmah hma a la lo a ni, a ti.

Hri kai thar nuai 3 chuang awm leh
Pathianni khan ram pumah hri kai thar mi 3,52,991 awm lehin, hripui vanga thi mi 2,812 an awm belh leh bawk. Ni nga chhung chu hri kai thar hi nitin nuai thum chuang an tling ziah tawh a ni.