Darkar 24 chhungin Covid-19 vanga thi 2,771 awm belh

India ramah Thawhṭanni khan Covid-19 hri kai thar nuai 3.23 awm belhin, mi 2,771-in an thihpui leh bawk. Pathianni aiin hri kai hmuhchhuah hi 8.4% in an tlem.

Ni ruk chhung chu a zawnin India ramah hri kai hmuhchhuah hi mi nuai thum chuang an awm ziah tawh a ni. Ram puma hri kai hmuh chhuah tawh hi mi vaibelchhe 1.76 tling tawhin, Covid-19 hri vangin mi 1,97,894 an thi tawh.

Ram chhunga hri leng tuar nasa ber state, Maharashtra-ah hri kai thar 48,700 awmin Mumbai khawpuiah erawh chuan hri kai hmuh chhuah hian tlakhniam lam a pan ṭan. Hri leng vanga state hrang hranga khuahkhirhna kalpui ani chungin hri kai thar hi an la pung zual zel a, Maharashtra, Kerala, Karnataka, Uttar Pradesh, Tamil Nadu, leh Delhi te chu hripuiin a tihbuai zualte an ni.

Karnataka-ah chuan nimin aṭang khan hri kai pung chak zel tur chhut chah nan kar hnih shutdown a puang. State chhungah hri kai thar mi 29,744 awm belhin ramchhunga doctor te lu tihaitu a ni chho ve leh mek.

Delhi-ah nikhat chhunga Covid-19 vanga thi tam ni ber thlengin, Thawhṭanni khan mi 380 an thi. Hri kai thar mi 20,201 an awm belh bawk. Kerala chuan Thawhṭanni khan thupek khauh tak siamin cinema hall, mall, gym, sport complex, swimming pool leh bar-te an khar tir. State sorkar chuan pawl hminga punkhawm a khap nghal bawk a ni.

Uttar Pradesh pawh dinhmun duhawm lo takah ding chhoin, Thawhṭanni khan hri kai thar 33,551 awm belh lehin, mi 249 an thi. Assam-ah hri kai thar mi 3,137 hmuh belh an awm a, mi 15 thih belhin hripui vang hian mi 1,215 in nunna an chan tawh. Assam a hri kai hmuhchhuah tawh hi nuai 2.4 chuang an ni tawh bawk.

India rama hri leng thawh hnihna thleng vanga hmun hrang hrang, a bikin damdawi-in damdawi leh oxygen supply indaihloh an tawh mek phuhruk nan ram eng emaw zatin India puih an tum thu an sawi.

Prime minister Narendra Modi leh US president Joe Biden te chu Thawhṭanni khan telephone kaltlanga inbiain, India rama hri leng dinhmunte an sawi. Hemi hma hian US chuan Covishield vaccine siam nana hmanraw ṭul angte a thawn tur thu a lo sawi tawh a ni. European Union, Germany, France leh ram dang eng emaw zatin India puih an inhuam thu hi anlo sawi tawh bawk.

Foreign ministry chuan UK aṭanga Covid medical supply,ventilator 100 leh oxygen concentrator 95 an lo thawn chu nimin khan India a rawn thleng tih an sawi.