EC-in inthlana chak lawm a khap

Election Commission of India (ECI) chuan state/UT pangaa assembly inthlan result, May 2-a puan a nih hunah ram chhunga hri pui leng mek avangin chak lawmna neih a, punkhawmte a khap.

Assembly inthlan hi Tamil Nadu, Kerala, West Bengal, Assam leh Puducherry-ah neih a ni. West Bengal tih lohah chuan inthlan hi zawhfel vek tawh niin, April 29 hian West Bengal-ah inthlan thawh hnuhnung ber neih a ni ang.

Hri leng thawh hnihna thleng mek inkarah inthlan hi buatsaih a nih vangin poll panel chuan political party leh party hruaitute tana zawm tur kaihhruaina pawh a siam a ni. Mahse he kaihhruaina siam hi political party leh an candidate-ten an zawm ṭha lo a, rally lian tham takte siamin, punkhawmna hmunah social distancing dan zawm a ni ngai lo bawk.

Assembly inthlan neihna tur state/UT-ah political party ten election campaign-a mipui tam tak punkhawm hun an siam reng chungchangah ECI chuan hma a la ṭha tawk lo nia sawiin, Madras High Court chuan hri leng hluar chhanah Election Commission hi mawhphurtuah a puh a, election officer-te chu tualthah thubuai siamsak tlak an ni tiin a sawi hial.