India-ah hripui vangin mi nuai 2 chuang thi tawh

India ramah hri kai thar leh thihpui an la pun belh zel a, Thawhlehni khan Covid-19 vanga thi hi mi nuai hnih chuang an tling tawh a ni.

Thawhlehni khan ram pumah hri kai thar 3,60,960 awm lehin, ni khata hri kai thar tam ber ni a ni leh. Ni sarih chhung chu a zawnin hri kai thar hi nuai thum chuang an awm ziah tawh. Hemi ni vek hian hripui vanga thi mi 3,293 awm bawkin, ni khata hri vanga thi an tam ber ni a ni leh bawk.

Union health ministry-in a tarlan danin, hri kai hmuh chhuah tawh hi mi 1,79,97,267 niin, an zinga 2,01,187 chuan he hri an thihpui tawh bawk. Hetih lai hian expert-te chuan sorkar-in official-a a chhinchhiah tel lo, hri kai leh thihpui hi eng emaw zat an awm a rinawm thu an sawi.

Hri kai hmuh chhuah thar zinga 78.53% hi hri leng hluar zualna state 10 - Maharashtra, Delhi, Uttar Pradesh, Chhattisgarh, Karnataka, Gujarat, Jharkhand, Rajasthan, Punjab leh Madhya Pradesh-a mi an ni. Maharashtra-ah hian hripui thihpui hi mi 895 awm belhin, Delhi-ah mi 381 an thi bawk.

India-a Covid-19 hri chi hran ang kai ram 17-ah hmu tawh

India rama Covid-19 hri inthlak danglam ang kai chu ram dang 17-ah a kai hmuh chhuah an ni tawh tih World Health Organisation (WHO) chuan Thawhlehni khan a sawi.

UN health agency chuan India rama hmuhchhuah hmasak ber, Covid-19 hri inthlak danglam, B.1.617 chu ram hrang hrang 17-ah kai 1,200 chuang hmuh an ni tawh a ni, a ti. Hemi rual hian he hri chi thar hi 'variant of concern' ah a la puang lo thung. A puang a nih chuan he hri hi Covid-19 hri hmuhchhuah hmasa ber aiin a hlauhawm a, inkaichhawn a awl zawk bakah vaccine lak aṭang pawha him thei lo tur anga ngaih a ni ang.

India rama hri chi thar hmuh chhuah bakah, hmun danga a chi dang hmuhte pawh inkaichhawng an tam zawk niin WHO chuan a sawi a, hei vang hian hri leng thawh hnihna hi a thawh khatna aiin a darh chak zawk a ni, a ti.