Delhi-ah CM aiin Lt Governor thuneihna sang zawk Sorkar laipuin GNTC Act hmanna tur tichhuak

Sorkar laipui chuan Thawhlehni khan Gover­n­ment of National Capital Territory of Delhi (Amendment) Act, 2021 siamṭhat chu hman turin a tichhuak a, he Act hmang hian Delhi-a mipuite thlan chhuah sorkar aiin sorkar laipui aiawhtu, Lieutenant Governor chuan thuneihna a nei sang tawh zawk dawn a ni.

BJP kaihhruai NDA sorkar thuchhhuah chuan, April 27 aṭangin GNCT Act chu hman ṭan nghal a nih thu leh, Delhi-a sorkar chu tunah chuan Lt Governor a ni ta tihna a nih thu a tarlang.

Ministry of Home Affairs (MHA) chuan Delhi Union Territory-a roreltu ber chu Lieutenant Govenor chu a ni tawh tih sawiin, Delhi sorkar pawhin thutlukna a siamna tur leh, a hmalakna turah LG ngaihdan hi a lak hmasak zel a ngai tawh dawn a ni, a ti.

GNLT Act siamṭhatna bill hi eptuten nasa taka an sawiselna karah kumin March 22 khan Lok Sabha-ah pass in, March 24 khan Rajya Sabha-ah pass a ni. Rajya Sabha-a eptu party member-te chuan he bill hi state chunga sorkar laipui inlulin tumna a ni tiin vote lak ni hian lungawi loin an chhuak tau a ni. Bill pass ni hian Delhi chief minister, Aam Aadmi Party (AAP) hotu Arvind Kejriwal chuan Indian democracy tana ni lungchhiathlak ber ni tiin a sawi hial.

Parliament in hniha pass a nih hnuah, presi­dent Ram Nath Kovind chuan thla hmasa vek khan Delhi Lieutenant Governor hnena thu­neihna sang zawk pekna tur dan siamṭhat hi hman theih turin a pawm a ni.

Delhi-a rorellai, AAP chuan he dan siamṭhat hi ram danpui nena inmil lo, political party-ten Delhi sorkar ro rel thei lo siam an tumna niin an sawi a, Parliament-a pass a nih chuan Supreme Court-ah thlen an tum thu an lo sawi tawh a ni. AAP bakah Congress, Trinamool Congress, Shiv Sena, DMK leh party dang eng emaw zat chuan BJP sorkarin GNTC Act a siamṭhat hi ram danpui kalh a ni tih an lo sawi tawh bawk.