Indian-American NGO-in USD mtd 4.7 hmu chhuak

Indian-American tlawmngai pawl, SEWA International USA chuan India in Covid-19 hripui thawh hnihna an hmachhawn mek chhawk zangkhai nan social media kaltlangin US dollar maktaduai 4.7 an hmu chhuak.

Sewa chuan Thawhlehni khan India-a thawn tur oxygen concentrator 2,184 an khawn khawm tawh a, darkar 100 ral hmain an fund-raising campaign kaltlangin Indian-American 66,700 chuangin USD mtd 4.7 an khawn chhuah hman thu an tarlang.

Tun dinhmuna Sewa hmachhawp lian ber chu India tana oxygen concentrator lakkhawm a, nunna chhanhim a ni tih an sawi. Volunteer-ten digital helpdesk an buatsaih kaltlangin ambulance service, damdawi-in khum ṭhnahnem tak, mipuite tana thisen leh medical supply awlsam zawka chhawpchhuah an tum thu a sawi.

American Association of Physicians of Indian Origins (APPI), US ethnic medical organization lian ber chuan Thawhlehni khan Covid-19 dona kawngkhat atan medical oxgyen mamawh a nih chungchangah rampum huap campaign buatsaihin, doctor an nihna ang pawha an chetchhuah a hun thu AAPI president Sudhakar Jonnalgadda chuan a sawi.

US Indian Chamber of Commerce DFW leh Indo American Chamber of Commerce of Greater Houston, Texas-a mite chuan USICOC Foundation nen ṭangdunin, batch khatna atan ventilator 20 chu Indian Red Cross Society, Delhi hnenah damdawi-in hrang hranga semchhuah turin a thawn a, ventilator 30 dang thawn turin hma an la leh mek. India ṭanpui an ngaihna kawngah theihtawp chhuaha hma an lak pui zel tur thuUS India Chamber chairman Ashok Mago chuan a sawi a ni.