Election Commission-in thuneihna a nei lo : SC
Election Commission-in Madhya Pradesh by-election neih tura Congress party-in star campaigner atana chief minister hlui Kamal Nath a ruatna titawp a tura a hriattir chu Supreme Court chuan a dan sak a, chief justice of India SA Bobde chuan hemi chungchangah hian EC hian thuneihna a nei lo, a ti.
Madhya Pradesh CM hluiin EC thupek tihchhuah chungchanga Supreme Court-a petition a thehluh chu nimin khan ngaihtuahin, Chief Justice chuan, "Star campaigner list-a candidate paih tur hian tunge paih che? Nangma thua ti nge party hruaitu thupeka ti in nih?" tiin Election Commission hi a chhal a ni.
October 20 khan Election Commission chuan Kamal Nath-a star campaigner nihna chu a hlihsak a, hei hi model code of conduct palzut a, inhnialna chawk chhuak thei thil a sawi fo vang niin a sawi. Hemi hma hian EC chuan Kamal Nath hi BJP leader Imarti Devi chungchanga a thusawi dan avangin warning a lo pe tawh bawk.
EC thupek tihchhuah avangin October 31 khan Nath hian Supeme Court-ah petition a thehlut a, "Star campaigner ruat tur chungchang chu party thuneihna a ni a, Election Commission hi party thutlukna siamah a inrawlh thei lo. EC thiltih dan chu fundamental right of expression and movement palzutna a ni," tiin a sawi.
Madhya Pradesh-ah hian assembly bial 28-ah by election neih a ni dawn a, heng zinga bial 22 chu Congress chhuahsana BJP zawmtu, Jyotiraditya Scindia thlawptu Congress MLA aṭanga bangte bial a ni. Congreess party chuan sorkarna siam turin heng bial 28-ah hian an chak vek a ngai dawn a ni.