India-ah hri kai thar nuai 3.79 leh Thihpui mi 3,645 an awm belh leh

India chuan record duhawm lo tak siambelh lehin, Nilaini khan Covid-19 hri kai thar mi 3,79,257 hmuhchhuah thar awmin khawvela ni khata hri kai thar tam ber ni a ni leh. Hemi ni vek hian mi 3,645 in nunna an chan bawk. Heti hian India rama Covid-19 hri kai hmuhchhuah tawh chu mi vaibelchhia 1.83 leh thihpui mi nuai 2.04 an awm tawh.

Kar khat chhung chu nitin hri kai hmuh chhuah thar nuai thum chuang an awm ziah tawh a ni. April 15 aṭang khan nitin kaithar nuai 2 chuang an awm ziah tawh bawk. Hri kai an pun chak chhoh em avangin ram chhungah damdawi-in khum, medical oxygen leh anti-viral drugs indaihlohna a thleng mek.

Karnataka leh Bengal chuan Nilaini khan hri kai tam ni ber thlengin, Karnataka-ah mi 39,000 chuang hri kai thar hmuchhuakin, Bengal ah pawh nikhat thilthuah mi 17,207-in hri an kai tih hmuhchhuah a ni bawk.

Ramchhunga hripui len nasatna ber Maharashtra state-ah chuan Nilaini khan Covid-19 vangin mi 985 an thi. Hri kai hmuh chhuah thar 63,309 awmin, Thawhlehni aiin hri kai thar hi 5% in a tlahniam. An state-a hri kai hmuhchhuah tawh zawng zawng hi nuai 6.73 an tling tawh. Mithiamte sawi danin, vaccine pekchhuah a chak loh chuan Maharashtra hi hripui leng thawh thumna hmachhawn mai thei dinhmunah an ding tih an sawi.

Kerala-ah chuan Covid-19 kai thar 35,000 awmin, Uttar Pradesh-ah case 29,000 hmuh chhuah ani. Delhi pawhin kar hnih curfew an kalpui mek a, case 25,986 hmuh thar an awm bawk.

Inrinni aṭang hian sorkar laipui chuan hripui leng mek dona atan covid vaccine puitling, kum 18 chin tan pekchhuah vek a tum. Nilaini khan mi vaibelchhe 1.3 in CoWIN kaltlanga vaccine la tura dil an awm thu sorkar website chuan a sawi.

Hri leng vanga harsatna hrang hrang thleng mekah US, UK, Russia leh China chuan India ṭanpuina tur an lo thawn dawn a, US secretary of defence Lloyd J Austin III chuan India rama frontline health worker-te tan an hmanraw neih ṭhat ang ang te thehchhuah an ui loh thu a sawi.

US hian oxygen cylinder 1,000, N95 mask maktaduai 15 leh rapid diagnostic test maktaduai khat, a vaia US dollar maktaduai 100 man chu India hnena an thawn tur thu White House thuchhuah chuan a tarlang.

India-a China ambassador Sun Weidong chuan Nilaini khan twitter kaltlangin Chinese medical suppliers te chuan chhun zan zawmin India aṭanga oxygen concentrator 25,000 order an hmuh chu thawnluh thuai theih nan an buaipui thu a sawi.

Rajasthan CM-in Covid-19 hri kai
Rajasthan chief minister Ashok Gehlot leh a nupui Sunita te chuan Covid-19 hri an kai. CM leh a nupui hi khung hran nghal an ni.

CM Gehlot chuan twitter kaltlangin hri a kai thu hi a puangzar a, a taksaah natna lanchhuahna a neih loh thu leh a inkhunghranna hmun aṭangin hna a thawh chhunzawm theih tur thu a sawi a, Covid-19 protocol zawm chungin nitin dar 8:30 ah doctor leh officer-te nen review meeting an nei ṭhin dawn tih a sawi.

US-in an mi leh sate India ram chhuahsan turin chah
India rama coronavirus strain thar 'B.1.617' hi ramdang 17 ah hmuhchhuah tawh niin, WHO chuan zirchianna neih a nih hnuin India ramah hripui leng thawh khatna aiin a thawh hnihna hi a darh chak zawk tih a sawi.

US chuan India rama hri leng hluar leh mek avangin hri kaite enkawlna tur pawh an indaih loh chho mek a, hei vang hian an mi leh sa, India rama awmte chu a rang thei anga India ram chhuahsan turin a chah a, midangte pawh India rama zin lo turin a rawn nghal bawk.