Vote chhiar nia counter centre-a kal tur Candidate-ten RT-PCR test neih vek ngai

Election Commission of India chuan tun hnaia state/UT panga-a assembly inthlan leh, by-election neihnaa vote tla, May 2-a chhiar turah ram chhunga hripui leng mek avangin khuahkhirhna a siam.

ECI chuan vote chhiar­na hmun, counter centre-a kal tur candidate leh an agent-te chuan RT-PCR test negative report an neih vek a ngai tih a sawi. Counting agent-te ṭhut dan tur pawh ruahmanna fel tak siamin, counting agent pahnih awmdun zinga pakhat chu PPE nen a inthuam zel tur tih a ni.

Counting centre lut turte chu thermal screening neih sak vek tur a ni a, face mask vuah reng tur a nih b akah hand sanitizer an pai tel bawk tur a ni, tiin ECI thuchhuah chuan a tarlang.

May 2-a vote chhiar leh inthlan result puan niah hian ECI chuan party-ten an chak an lawm a lo khap tawh bawk. "Ram chhunga hri leng hluar chho leh mek avangin Commission chuan May hnu lamah pawh inthlana chak lawm hi a khap a ni," tiin inthlanna a chak candidate-te pawhin returning officer hman aṭanga certificate an lak dawnin mi pahnih aia tam a hruai khapsak an ni bawk.