Narendra Modi leh Xi Jinping Vawi 3 an inhmu dawn
Prime minister Narendra Modi leh China president Xi Jinping-te chuan November thla chhung virtual summit-ah ṭum thum an inhmu dawn.
Ram hruaitu pahnihte hi November 10-a Shanghai Cooperation Organisation Heads of State summit neih tur leh, November 17-a BRICS summit leh November 21-22 a G20 summit neih turah an inhmu dawn a ni. BRICS leh SCO summit hi Russia-in a host dawn a, G20 summit hi Saudi Arabia-in a host thung ang. Hripui leng vangin heng summit-te hi virtual-a neih vek an ni dawn a ni.
Ramri chungchangah India leh China hi kumin May thla aṭang tawh khan vawi tam an intithiam lo tawh a, June 15 khan Ladakh khawchhak lam, Galwan Valley-a Line of Actual Control (LAC)-ah India leh China sipaite inkarah buaina chhuakin India sipai 20 an thi a ni. LAC-a intihbuainaah hian China lam sipai zingah pawh thi an awm niin Indian Army chuan a tarlang.
He thil thlen hnu hian India leh China inkarah buaina lian tham ni lo a thleng zui bawk a, ram pahnihte chuan ramriah sipai an dahbelh zui ve ve bawk. Ramria buaina chhuah fo vang hian vawi tam tak commander level-ah inbiakna neih a ni tawh bawk.
November thlaa summit hrang hrang neih tur bakah hian November 13-15 hian ASEAN summit neih tum a ni bawk a, he summit hi Vietnam chuan a host dawn a ni. Hei bakah hian November 30-ah SCO heads of government summit neih tum a ni a, India chuan a host ang.