US aṭangin emergency aid supply a rawn thleng

India rama hri leng thawh hnihna thleng meka harsatna hrang hrang a tawhte chhawk zangkhaina tur atana US-in ṭanpuina a thawn, emergency aid supply hmasa ber chu nimin zing khan India an rawn thleng.

Hun eng emaw chen chu ni khatah hri kai thar nuai thum chuang an awm chhoh tak zel avanga social media kaltlanga India-in damdawi-in khum leh medical oxygen a mamawh zia tlangaupuina chuan rah ṭha tak a chhuah zel. US bakah ram dang tam takin hri kaite enkawlna tur atana mamawh, damdawi leh oxygen-te thawn an tum thu hi an sawi tawh bawk.

US aṭanga ṭanpuina thawn hi Super Galaxy military transporter hmangin Delhi international airport-ah phurh thlen a ni. Ṭanpuina tur an rawn thawn hi oxygen cyldiner 400 chuang, rapid coronavirus test kit maktaduai khat dawn leh damdawi-in hmanrua dang eng emaw zat a ni.

US Embassy chuan, "United States in Covid-19 tuarte ṭanpuina a thawn te chuan India a thleng ta! Kum 70 chuang kan thawhdunna chu United States chuan a hre reng a, India in Covid-19 hri leng an tawrhna te hi kan sualchhuah pui dawn a ni " tiin twitterah a tarlang. US thuneitute chuan karleh lamah special flight hmangin medical bungrua eng emaw zat, sumdawng leh mimalin a thlawna an pekte chu India-ah thawn a ni dawn tih an sawi bawk.

US President Joe Biden chuan India ṭanpui zel intiamin, an mamawh laia India-in US damdawi-inte a puihbawm ang bawkin ṭanpui let an bat thu a sawi.