AAP MLA-in Delhi-ah President's Rule puan phût

Delhi-a rorellai, Aam Aadmi Party (AAP) MLA Shoaib Iqbal chuan Delhi khawpui chhunga hri leng hluar zel avangin President's Rule puang mai turin a phût.

Shoaib Iqbal chuan hri kai an pun chak em avang leh, damdawi-in hrang hrangte an indaih tawh loh avangin amah leh Delhi sorkar chuan mipuite an pui thei tawh lo a ni tiin, President's Rule hnuaia an awm mai a ngai tawh niin a sawi. A thusawi chungchangah hian AAP lam chuan engmah sawi an la nei lo.

Delhi High Court hnenah thla thum chhung atan Delhi-a President's Rule puang tura ngenin, AAP MLA chuan, "Delhi dinhmun hi a chhe tawh hle a ni. President's Rule puan a nih thuai loh chuan khawpui chhung hmun tinah mitthi ruang a awm tawh mai dawn a ni. Mipuite mangan dan te, damdawi leh oxygen-te an hmu thei lo tih ka hmuh hian ka lung an tichhia a, ka mu thei tawh lo a ni. Keima ṭhianṭha ngei pawh ka ṭanpui thei tawh lo a ni," a ti.

Delhi khawpuiah hian Ningani khan Covid-19 hri vanga thi mi 395 awmin, hri len hnua ni khata hri vanga thi an tam ber ni a ni. Ni riat chhung chu hri vanga thi hi nitin 300 chuang an awm tawh a ni. Hemi ni vek hian hri kai thar 24,235 awm belhin positivity rate hi 32.82% a tling tawh.

Hri kai thar 3,86,452 awm belh leh
India ram pumah Ningani khan Covid-19 hri kai thar 3,86,452 an awm belh leh a, ni khatah hri kai thar tam ber ni a ni leh. Hemi ni vek hian hripui vanga thi mi 3,498 an awm belh leh bawk.

Ningania hri kai thar zinga 73.95% hi state/UT 10 - Maharashtra, Uttar Pradesh, Delhi, Karnataka, Kerala, Chhattisgarh, West Bengal, Tamil Nadu, Andhra Pradesh leh Rajasthan-a mi an ni.