State tam zawkin kum 18 chin vaccine pek hun titlai dawn

Sorkar laipuiin vawiin aṭangin ram mipui kum 18-45 hnena Covid-19 vaccine pe chhuak ṭan turin ruahmanna siam mah se, state tam tak chuan vaccine an indaih loh avangin sorkar hun ruatah hian an pe chhuak ṭan thei dawn lo tih an sawi.

Andhra Pradesh, Telangana, Kerala, Assam, West Bengal, Punjab, Meghalaya, Arunachal Pradesh, Tamil Nadu leh Delhi chuan vaccine an indaih loh avangin kum 18 chin tana vaccine pek tur hi an tikhawtlai dawn tih an lo sawi chiang tawh a, an pek ṭan hun tur an la sawi thei lo.

Madhya Pradesh a hunbi dikah pek hman tumin hma la mah se vaccine hi an indaih rih loh avangin May 3 vel aṭangin pek ṭan theih an tum tih a sawi. Maharashtra state chuan vaccine hi dose maktaduai 2.5 an kawl phawt loh chuan kum 18 chin hnenah an pe dawn rih lo tih a sawi. Jharkhand pawhin May 15 hnu lamah pek theih a inring tih a sawi bawk.