State/UT 5-a assembly inthlan result puang

State leh Union Territory panga-a assembly inthlan result chu nimin khan puan a ni a, hemi rual hian state ṭhenkhata by-election neih result pawh puan nghal a ni bawk.

Assembly inthlan hi March 27-April 29 inkar khan neih a ni.

Assam
Assam-ah rorellai BJP chu a term hnihna atan hneh taka thlan tlin an ni leh. Inthlan hi thawh thuma neiin March 27, April 1 leh April 6-ah vote thlak a ni a, vote tla hi 82.04% a ni.

Assam-ah hian BJP hian Asom Gana Parishad (AGP), the United People''s Party Liberal (UPPL) leh Gana Suraksha Party (GSP) a thawhpui a, eptu ṭangrual pawl 'Mahajoth' ah Congress, AIUDF, Bodoland Peoples'' Front (BPF), CPI(M), CPI, CPI(ML) Liberation, Rashtriya Janata Dal (RJD) leh Anchalik Gana Morcha (AGM)-te an thawkho thung.

Seat 126 awmah BJP kaihhruai hian seat 78 lain, Congress kaihhruai ṭangrual pawl hian sat 48 an la a ni.

West Bengal
West Bengal-ah Mamata Banerjee kaihhruai Trinamool Congress (TMC) chuan hnehna an chang leh.

Seat 294 awmna, West Bengal assembly-ah hian seat 292-ah inthlan hi neih a ni a, seat hnih-ah erawh chuan candidate zinga thi an awm avangin vote thlak a ni lo. May 16-ah heng seat pahnihah hian inthlan hi neih a ni ang.

West Bengal-ah BJP chuan thuneihna chan ngei tumin an bei nasa hle a, prime minister Narendra Modi, union home minister Amit Shah leh union minister dangte pawh campaign-in an kal fo a, mahse Mamata kaihhruai TMC leh a thawhpuite chu an paihthla zo ta lo.

Rorellai TMC leh a thawhpuite hian seat 213 an la a, majority nei tura seat neih ngai 148 an pel hneh hle. BJP leh a thawhpuiten seat 78 an la bawk.

Chief minister Mamata chu Nandigram bialah BJP candidate Suvendu Adhikari nen an inkhing a; Mamata hi chaka puan a nih zet hnuah a khingpui hi chaka puan a ni zui leh a, Mamata chuan court-a an kal tur thu sawiin, "Thil an tihkual vel dan ka hria a, court-ah chinfel a ni ang," a ti. TMC hian kum 2011 aṭangin West Bengal-ah hian sorkarna an siam tawh a ni.

Kerala
Seat 140 awmna, Kerala assembly inthlanah chuan Communist party of India-M (CPI-M) kaihhruai Left Democractic Front (LDF) chuan a term hnihna atan sorkarna an siam leh dawn.

LDF-ah hian Communist Party of India (Marxist), Communist Party of India, Kerala Congress (M), Nationalist Congress Party, Janata Dal (Secular), Indian National League bakah party tenau ṭhenkhat an tel.

Kerala inthlan hi April 6 khan vote an thlak a ni a; LDF hian seat 97 la tawhin, UDF hian seat 42 an la tawh bawk.

Tamil Nadu
Seat 234 awmna, Tamil Nadu assembly inthlanah MK Stalin kaihhruai Dravida Munnetra Kazhakam (DMK) leh a thawhpuite an tling. DMK thawhpui zingah hian Congress party an tel a ni.

DMK leh a thawhpuite hian seat 138 -ah hnehna an chang a, sorkarna siam tur hian seat 118 neih phak a ngai a ni. Rorellai AIADMK kaihhruai NDA chuan seat 93 a la bawk.

Puducherry

Puducherry Union Territory-ah hian assembly seat 30 a awm a, heng zinga seat panga chu Scheduled Caste chanpuala dah a ni. April 6 khan vote thlak a ni a, vote 81.70% a tla.

Seat 30-ah All India NR Congress chuan seat 7 la tawhin, a thawhpui BJP-in seat 3, DMK leh Congress thawkdun chuan seat 5 an la tawh bawk.