ECI-in Nandigram bial vote chhiar ṭhat dilna a hnawl

West Bengal assembly inthlan neih zawh taka Nandigram biala vote tla chhiar ṭha leh tura Trinamool Congress (TMC) ngenna chu Election Commission of India (ECI) chuan a hnawlsak.

Nandigram bialah hian TMC hruaitu, chief minister Mamata Banerjee leh a thachhang dawltu ber ṭhin BJP-a inpe ta, Suvendu Adhikari-te an inkhing a, ngaihven pawh a hlawh hle. May 2-a vote chhiar khan he bialah hian Mamata chu vote 1,200-in a chak tia puan a ni a, mahse a hnuah he result hi a dik lo tiin BJP candidate Adhikar zawk chu vote 1,956 in a chak tia puan leh a ni.

TMC chuan he biala vote tlate chhiar danah thil fel tawk lo a awm tih sawiin, Mamata Banerjee ngei pawhin thil dik lo a awm a, court lamah a thlen ngei tur thu a sawi zui bawk.

TMC senior leader Derek O'Brien chuan, "Nandigram-ah hian thil felhlel chu a awm a ni. Seat pumpui hmu lia ṭhena hmun thum dawn la pha party-a hotu leh chief minister a biala a chak zo lo hi thil fel lo tak a awm a ni," a ti.

West Bengal in­thlanah hian rorellai TMC hian inthlan neihna assembly seat 292-ah seat 213 an la. BJP chuan seat 77 lain, Rashtriya Secular Majlis party leh independent-in seat khat ve ve an la bawk.

Mamata Banerjee hi tling zo lo mah se chief miniser a ni zui thei dawn tho a ni. Mahse sorkar thar lakluh a ni aṭanga thla ruk chhungin assembly member atan thlan tlin a ngai dawn thung. An party MLA zinga pakhatin a seat kianin by-election neih a ni thei a, a nih loh pawhin candidate thi an awm avanga inthlan la neih lohna bial pahnih awmah a ding dawn tih party lamin an la tichiang dawn a ni.