Kerala-ah BJP-in a seat khat neih hum zo lo

Kerala assembly in­thlanah centre-a rorellai, BJP kaihhruai National Democratic Alliance (NDA) chu seat khat pawh la loin a artelukhawn.

Rorellai, CPI-M kaihhruai Left Democratic Front (LDF) chu sorkarna siam tura thlan tlin nawn leh an ni a, kum 2016 inthlan aiin seat paruka la hnemin assembly seat 140 awmah bial 97-ah an chak a ni. Congress kaihhruai United Democratic Front (UDF) chuan seat 47 an la ve bawk.

Chief minister Pinarayi Vijayan kaihhruai LDF hi Kerala-ah kum 40 chhunga a zawna term hnih sorkarna siam thei awmchhun a ni dawn. CPI hruaitu, kum 70 mi CM Vijayan hi Kerala chief minister ni tawh zinga a zawna term hnih chelh thei tur pathumna a ni dawn bawk a ni.

CM Vijyan chuan, "Kerala hian chi leh sakhaw tibing zawnga thil kalpuina a duh ngai lo a, BJP tan hmun a awm lo", a ti. LDF hneh taka thlan tlin an nih chhan pawh Kerala-in sakhaw inthliarna an duh loh zia lantirna chiang tak a ni, a ti bawk. Congress hruaitu Rahul Gandhi pawh beiin, BJP paihthlak an nih theihna tura BJP sorkarna state-a campaign-na tur tam tak a awm laiin, Kerala lam ringawt buaipuiah a puh.