MP CM-in journalist-te frontline worker-ah puang

Madhya Pradesh chief minister Shivraj Singh Chouhan chuan an state-a journalist-te chu Covid-19 hri leng dona kawngah a hmatawngtu, frontline worker zingah telh an ni tih a puang.

Hemi hma hian Odisha CM Naveen Patnaik leh Bihar CM Nitish Kumar-te chuan working journalist-te chu frontline Covid warrior-ah an lo puang tawh bawk. Uttarkhand state pawhin frontline worker zingah a lo telh tawh bawk a ni.

Ram chhunga hri leng hluar chho leh mekah journalist eng emaw zatin hri hi an lo thihpui tawh a, hri kai enkawl lai tam tak an awm bawk.

Sorkarin journalist-te frontline worker-ah a puan hian Covid-19 vaccine peknaah dah pawimawh hmasak zingah telin, an hnathawhna aṭang hri kaia an thihpui a nih chuan insurance cheng nuai 50 dahsak an ni bawk.

CM Chouhan chuan, "Boruak khirh leh hlauhawm tak karah journalist-te chuan an hnate rim tak leh inpe takin an thawk chhunzawm reng a ni. Hei vang hian accredited journalist-te chu frontline worker zingah telh hi kan rel a ni," a ti.