Khawvel puma hri kai thar zinga 53% India rama mi

India ramah Covid-19 hri kai an la pung chak hle a, nimin thleng khan ram puma hri kai hmuh chhuah tawh hi vaibelchhe hnih an chuang tawh.

Thawhṭanni khan hri kai thar nuai 3.57 chuang awm lehin, he hri vanga thi mi 3,449 an awm belh leh bawk. Thawhṭannia khawvel puma Covid-19 hri kai hmuh chhuah thar zinga 53% chu India rama mi an ni a, hemi ni veka hri vanga thi zinga 33% chu India rama thleng a ni bawk.

Hri kai an pun chak avangin state hrang hranga damdawi-inah thawktu bakah hri kai enkawlna tur damdawi leh hmanraw mamawhte an indaih tawh lo hle a, hei vang hian ram tam takin India puihna atan oxygen concentrator, ventilator leh damdawi leh hmanraw mamawh dangte an rawn thawn lut mek a ni.

Prime minister Narendra Modi chuan damdawi lam thawktu indaih lohna thleng mek phuhruk turin MBBS final year zirlai leh BSC GNM-qualified nurse-te chu Covid duty tura dah theih an ni tih a sawi. Medical personnel, Covid duty-a ni 100 thawkte chu sorkar hna lakah dah pawimawh hmasak an nih tur thu PM chuan a sawi bawk.

SC-in lockdown chungchang ngaihtuah turin ti
Supreme Court chuan ram chhunga hri leng hluar chho zel avangin mipuite him zawkna atana lockdown puan mai a ngaih leh ngaih loh chungchang chu ngaihtuah turin sorkar laipui leh state sorkarte a hrilh.

Hemi rual hian SC chuan lockdown puan a nih dawn pawhin, mirethei leh harsa zawkte mamawh ngaihtuahin sorkar chuan ruahmanna a siam hmasa phawt tur a ni, a ti bawk.

Lockdown puanin khawtlang leh eizawnna, sum leh pai lakluhna kawnga nghawng a neih dan, a bikin dinhmun harsa zawkte a nghawng dan pawh hriatchian a nih thu sawiin, Court chuan heng mite dinhmun leh harsatnate hrethiam a, an tan ruahmanna siam hmasak phawt a ṭul thu a sawi.

US health expert-in ram pum lockdown puang turin thu rawn
US top public health expert leh White House chief medical adviser Dr Anthony Fauci chuan India rama hri darh zel chhut chah a nih theihna atan ram puma lockdown puan a, vaccine pek chhuah chak zawka kalpui leh, hri kaite enkawlna tur makeshift hospital tam zawk siam turin thu a rawn.

Khawvela infectious disease specialist ṭha ber zinga ngaih, Dr Fauci chuan India sorkarin hri leng an do hneh nia an lo puan tawh pawh, a hun hmain a puang a ni, a ti.

India ram dinhmun tawh mek chu mi zawng zawngin an ngaihven a ni tiin, Dr Fauci chuan," Mi tam takin hri an kai thar zel a, hri kaite enkawlna tur indaih lohna lian tak a awm a, hospital khum leh oxygen supply te a indaih loh chuan, dinhmun ṭha lo tak a ni tawh. Hei vang hian ram dangte pawhin an theih anga puih an ngai a ni," tiin a sawi.