Sipaite'n hri kai enkawl turin medical officer-te an ko let

India-in Covid-19 hripui leng thawhhnihna a hmachhawn mek avangin Armed Forces ten ruahmanna hrang hrang siamin, sipai doctor leh damdawi-in a thawklai ṭhahnem tak chu an hnathawhna aṭangin mipuite pui turin a ko haw.

Recruiting office, National Cadet Corps (NCC)-a medical officer leh staff-te chu hripui leng hluarna hmuna thawk turin a ko let a, doctor indaihlohna phuhruk nan defence ministry chuan April 23 khan Armed Forces Medical Services (AFMS) hnuaia Short Servive Commissioned doctor 238 chawl tawh te chu December 31 thleng an service a pawhsei sak tawh bawk.

Doctor course kallai te pawh tihtawp vek an ni a, sipai doctor ṭanglai te pawh a ṭul anga mipui tana rawn theiha awma quarantine centre vil tura pawhpen theih turin hma an la mek tih official-te chuan an sawi.

AFMS hnuaia oxygenated bed 1,821 awm ṭhin chu siambelhin, April 30 khan 4,220 ah tihpun niin, a aia tam dahbelh tura hmalak an tum bawk. Sipai hian hmun hrang hrangah damdawi-in siam belh zel a tum a, sipai ṭanglai mipa leh hmeichhia ṭhahnem tak chu an inlum chhuahsanin damdawi-in a thawk turin an inpe tih an sawi bawk.

Sipaite hian Delhi airport bulah khum 500 awmna Sardar Vallabh Bhai Pattel Covid Hospital an siam a, he hmunah hian Army, Navy leh Air Force aṭangin medical officer 122, nursing officer 48 leh paramedical staff 120 dah an ni.

Dhanvantri Covid Care Hospital, Ahmedabad ami chu Armed Forces Medical Services ṭanpuina hnuaia hman theiha peih a ni bawk. He hmunah hian khum 900 awmin, dam lo na zual 200 chuang enkawl mek an ni a, ICU pawh peihfel ṭep tawh niin, he hospital-a thawk tur hian service pathuma healthcare staff 70 chu dah an ni.

Bihar, Lucknow leh Varanasi-ah pawh sipaite hian hri kai enkawlna tur siam mekin, peihfel thuai a ni ang tih an sawi.