Delhi sorkarin auto leh taxi driver-te ṭanpui dawn

Delhi chief minister Arvind Kejriwal chuan hri leng vanga Delhi khawpuia lockdown puan a nih avanga eizawnna kawnga harsatna tawk, auto leh taxi driver-te chu sorkarin sumin a pui dawn tih a sawi.

CM Kejriwal chuan thla hnih chhung atan auto-rickhsaw leh taxi driver-te chu Rs 5,000 ṭheuh pek an ni dawn tih a sawi a, hei bakah hian khawpui chhunga ration card nei mi nuai 72-te hnenah thla hnih atan ration a thlawna pek an ni dawn bawk.

Nikuma lockdown puan vang khan Delhi sorkar hian khawpui chhunga auto leh taxi driver mi nuai 1.56 hnenah ṭanpuina, Rs 5,000 ṭheuh a lo pe tawh bawk a ni. Delhi-ah hian hri leng hluar zel avangin May 10 thleng atan lockdown puan a ni.