Delhi HC-in court thupek zah loah sorkar laipui puh : Sorkar laipuiin Supreme Court-ah petition a thehlut

Delhi High Court-in Delhi khawpui huam chhunga hri kaite enkawlna tura oxygen indaih lohna nasa tak thleng mekah mamawh ang oxygen pe tura a hriattirna chu sorkar laipuiin a zawm loh vangin, BJP kaihhruai sorkar laipui chu court thupek zah lohah puhin Thawhlehni khan show-cause notice a pe.

Delhi khawpui huam chhunga Covid-19 hri kai nasa takin an pung a, damdawi-in hrang hrangah dam lo enkawlna tur oxygen indaih lohna a thlen chhoh mek avangin an buai tawh hle a ni. Hei vang hian Delhi High Court chuan sorkar laipui hnenah nitin oxygen metric ton 700 pe turin a lo hriattir tawh a ni.

Sorkar laipuiin court thupek hi a zawm loh avangin show-cause notice hi pein, High Court chuan, "Thil hi a tawk chin a awm. Oxygen supply chungchangah 'Aih' tia chhanna kan duh lo. A rang thei anga bera oxygen metric ton 700 supply lohna chhan tur a awm lo," tiin sorkar laipui hi a hrawk zui.

SC-ah sorkar a zualko
Delhi High Court-in show-cause notice a pek chungchangah sorkar laipui chu Supreme Court-ah a zualko a, nimin chawhnu lam khan justice DY Chandrachuh leh MR Shah awmna bench chuan an ngaihtuah zui nghal a ni.

Supreme Court chuan Delhi-a hri leng dinhmun chu a ṭha lo takzet tih sawiin, sorar laipuiin ram chhunga hri leng thawh hnihna thleng mek do letna kawngah eng angin hnge hma a lak tih a zawt.

Court chuan ni thum liam ta chhunga Delhi-a oxygen supply a nih dan report thehlut turin BJP sorkar chu a hriattir bawk a ni. Hri leng mek dona kawngah sorkar laipui chuan Mumbai tihdan a entawn a, Delhi khawpui chhunga oxygen mamawh zat supply tura theihtawp a chhuah a ngaih thu a sawi.