Covid positivity rate 10% aia sanna hmunah lockdown puang turin duh

Ramchhunga corona­virus hri leng in zual lam a pan zel avangin All India Institute of Medical Science (AIIMS) director Dr Randeep Guleria chuan Covid-19 positivity rate 10% emaw damdawi-in khum 60% luah khat an nihna hmunah te lockdown khauh taka kalpui tura a duh thu a sawi.

AIIMS Director chuan Thawhlehni khan he thu hi sawiin, mipui mimir khawsak dan tibuai lo thei ang bera inkhuahkhirhna kalpui dan ruahman turin a chah a, zan curfew leh kartawpa lockdown puan ṭhinte chuan hri leng chhutchahna kawngah awmzia a neih tlem thu a sawi bawk.

Home Ministry-in kaihhruaina a siamte chu kenkawh a ni tawk lo tih Guleria chuan a sawi a, hemi rual hian positivity rate hniamna ah chuan zawi zawi a inthlahdul a ṭul thu a sawi. Mahse positivity rate sanna aṭanga rate hniamna a zinte lakah khuahkhirhna khauh tak siam a ṭul thu a sawi a ni.

Guleria chuan ram puma lockdown kalpui chuan nitina inhlawhchawpa eizawng­te a nghawng natzia thlir chungin, hri kai awm dan azira khuahkhirhna siam a ṭhat thu a sawi bawk. Ram pum huapa lockdown puan chu buaina chinfelna tur a nih lo tih a sawi.

Hri kai an pun zel avangin damdawi-in khum leh oxygen indaih lohna te a pung zel a, damlo hi an pun belh zel chuan healthcare infrastructure lamin a zo lo thuai dawn a, hei vang hian hemi atan ruahmanna lo siam a, khuahkhirhna khauh tak awmze nei kalpui a ngai a ni, a ti.