India ah hri kai thar nuai 4.12 awm leh : Ni khata hri vanga thi tam ber ni thleng

7th May, 2021

India chuan mellung duhawm lo tak siamchho lehin, Nilaini khan ram pumah Covid-19 kai thar mi 4,12,262 hmuhchhuah an awm leh. Hemi ni vek hian mi 3,980 in hri vang hian nunna chanin, nikhat thilthua hripui vanga thi tam ber ṭum a nih thu Union Health Ministry chuan a tarlang.

Ram pumah hripui vanga thi nuai 2.3 chuang awm tawhin, hri kai enkawl mek mi 35,66,398 an awm bawk. India-ah ni khata hri kai nuai li chuang hmuh chhuah hi ṭum hnih a thlenna a ni a, May 1 khan hri kai thar mi 4,01,993 hmuhchhuah a lo ni tawh bawk a ni.

May 5 khan Covid-19 kai thar nuai 3.82 leh thi 3,780 an awm a, ni 15 chhung chu a zawnina nitin hri kai thar mi nuai 3 chuang hmuhchhuah ziah a ni tawh. Indian Council of Medical Research (ICMR) chuan Nilaini thleng khan sample 29,67,75,209 test tawhin, nimin khan sample 19,23,131 test belh leh an ni.

Maharashtra, Karnataka, Uttar Pradesh, Kerala, Rajasthan, Gujarat, Andra Pradesh, Chhattisgarh, Tamil Nadu, West Bengal, Bihar leh Haryana te chu coronavirus active-case tamna state an ni. Kar liam ta chhunga khawvel puma hri kai thar zinga 46% chu India rama mi niin, hemi hun chhunga hripui vanga thi zinga 25% chu India rama thleng a ni bawk tih World Health Organisation (WHO) chuan a sawi.

Kum 2019-a Covid-19 hri hmuhchhuah a nih aṭangin khawvel pumah he hri vang hian mi maktaduai 3.2 in an thihpui tawh. UNICEF Executive Director Henrietta Fore chuan, "Khawvel hi kan ṭanrual a, India kan ṭanpui loh chuan, a nghawng hi a na dawn tak zet, hri vanga thihna, hri inthlak danglam leh nitin mamawh zawn kawnga harsatna nasa zual thleng thei reng a ni," tiin Thawhlehni khan a sawi.

Mithiamte chuan India chu hri pui leng thawhthumna thleng thei lakah lo inringlawk turin an chah. "Hri kai chak dan chhutin hri leng thawh thumna chu pumpelh theih loh nia ngaih a ni. Mahse a thawh thumna rei zawng tur erawh chhut thiam a harsa a, hei vang hian kan lo inbuatsaih lawk a ngai," tiin principal scientific advisor K Vijay Raghavan chuan Nilaini khan a sawi.