Covid-19 vangin Union Minister hlui a thi
Union minister hlui leh Rastryia Lok Dal (RDL) hotu, Chaudhary Ajit Singh chu kum 82 mi niin nimin khan Covid-19 vangin a thi.
Ajit Singh hian a fapa Jayant Chaudhary leh fanu pahnih a kalsan. India Prime minister hlui Chaudhary Charan Singh-a fapa, Chaudhary Ajit Singh hi April 20 khan Covid-19 positive a ni tih hriatchhuah a ni a, Ningani khan hri vang hian a thi tih a fapa Jayant Chaudhary chuan a sawi.
Chaudhary hian kum 1986 khan Rajya Sabha MP niin a politics zinkawng a zawh ṭan a, political party-te inkar thawhhona siamna kawngah a thawh hlawk ber pawl a ni.
Ajit Singh hi prime minister VP Singh hnuaiah December kum 1989 - November 1990 inkar khan union minister of industry enkawlin, PV Narasimha Rao prime minister-na hnuaiah union minister of food a ni leh. Atal Bihari Vajpayee kaihhruai sorkarah kum 2001-2003 inkar khan minister of agriculture a lo ni tawh bawk. Kum 2011-a an party in sorkar lai United Progressive Alliance (UPA) an zawm hnuin December 2011 aṭanga May 2014 thlengin minister of civil aviation a ni leh bawk.