Fuel mamawh zat a tlahniam

India rama Covid-19 hri leng thawh hnihna thleng mekah state leh khawpui tam takin khuahkhirhna an siam avangin, April-June thla chhunga fuel mamawh zat chu 20-25% velin a tlahniam thei dawn niin consultancy Wood Mackenzia report chuan a tarlang.

Hri leng hian energy market chauh ni lo, sector hrang hrang a nghawng tih report-ah hian tarlangin, ram pum lockdown puan ni lo mah se Q2 (April-June) chhungin fuel mamawh zat hi a tlahniam dawn hle a ni, a ti. Kum 2021-a India GDP 9.9% vel tura lo rin pawh hri leng thar leh avangin 9% ah a tlahniam tawh niin a sawi. Lockdown leh khuahkhirhna khauh zawkte hman zui zel a la nih phei chuan hei ai hian a tlahniam zel dawn niin a sawi bawk.

Nikuma hri leng vanga rampuma lockdown puan a nih lai khan, April-June chhunga India-in fuel a mamawh zat chu ni khatah barrel maktaduai 1.2 velah tla thlain, demand tlakhniamna hi 25% a tling. Nikum April thla bika fuel mamawh tlakhniamna chu 45% a tling pha.

Kuminah chuan April thlaa petrol hralhchhuah chu March thla aiin 6.3% in a tlem zawk a, diesel pawh March thla aiin 1.7% in an hralh chhuak tlem zawk bawk.