India-ah ni 10 chhungin Covid-19 vangin mi 36,110 an thi

India ramah Ningani khan hri kai thar 4,14,554 hmuh chhuah niin, ni hnih chhung chu a zawnin hri kai nuai 4 chuang hmuh an ni.

Ni 10 liam ta chhung khan India ramah Covid-19 vanga thi mi 36,110 an awm hman a, darkar khata mi 150 zel thi anga chhut a ni. Ni 10 chhung chu hripui vanga thi hi mi 3,000 chuang an awm ziah tawh a ni.

Ningani khan rampumah hri kai zinga mi 3,927 an thih belh leh bawk.

India hian ni 10 chhunga Covid-19 vanga thi tam ber record a siam a ni. A hmaa US-in record a lo siamah chuan ni 10 chhungin mi 34,798 an thi a, ni 10 chhung vekin Brazil ramah mi 32,692 an lo thi tawh bawk tih World Health Organization (WHO) chuan a sawi.

Ram pumah hri kai hmuh chhuah belh zel niin active case 36,45,164 an awm tawh a, active case hi hri kai hmuh chhuah tawh aṭangin 16.96% a tling pha a, hri kai enkawl dam recovery rate chu 81.95% ah a tlahniam tawh thung. Hri thihpui zat hi 1.09% a ni bawk.

India ramah Covid-19 hri kai hi kum 2020, August 7-ah nuai 20, August 23-ah nuai 30, September 5-ah nuai 40, September-16 ah nuai 50, September-28 ah nuai 60, October-11 ah nuai 70, October 29-ah nuai 80, November 20-ah nuai 90 awmin December 19-ah chuan vaibelchhe khat a pel chho a ni. Hri leng thawh hnihna na tak thleng chho lehin, kumin May 4 khan hri kai zat hian vaibelchhe hnih an pel tawh a ni.

ICMR in May 6 thleng Covid-19 sample test 29,86,01,699 nei tawhin, Ningani khan sample 18,26,490 test leh a ni.

Union Health Ministry chhinchhiah danin state 10 - Andra Pradesh, Maharastra, Uttar Pradesh, Delhi, Karnataka, Kerala, Haryana, West Bengal, Tamil Nadu leh Rajasthan-ah rampuma hri kai hmuh chhuah thar zinga 70% an awm.