India-ah AstraZeneca vaccine mtd.60 thawn turin Biden ngen

American civil rights hotu Rev Jesse Jackson chuan Chicago-a news conference a neihnaah, coronavirus hri leng thawhhnihna tuar na ber, India hnenah AstraZeneca vaccine dose maktaduai 60 thawn turin US president Joe Biden a ngen.

AstraZeneca vaccine hi US chuan a la pawmpui lo a, hei vang hian Preisdent Biden kaihhruai sorkar chuan an ramah a hman a rinawm loh hle. Mahse Biden chuan he vaccine hi ramdang hnena thawnchhuah a tum thu a lo sawi tawh thung.

Rev Jackson chuan, "Hri leng tuar mek, India rama nunna chhanhim nan vaccine a tam thei ang ber pek chhuah chu kawng awmchhun a ni," tiin India rama na taka hri leng thawk leh mek chu tihtawp pui an nih thuai loh chuan khawvel hmun dangah a ṭaidarh leh mai dawn a ni, a ti.

India dinhmun tawn mek chu a ngaihtuah takzet tih Rev Jackson chuan sawiin, healthcare industry-te chu India ram tana oxygen concentrator leh cylinder pe turin mimal taka ngen pawh a la tum tih a sawi.