Tamil Nadu leh Puducherry CM thar lalut

Tun hnaia assembly inthlan neihna, Tamil Nadu leh Puducherry-a chief minister thar tur chu nimin khan lakluh an ni.

Tamil Nadu
Tamil Nadu assembly inthlana hnehna changtu, Dravida Munnetra Kazhagam (DMK) hotu MK Stalin chu nimin khan Chief Minister thar atan lakluh a ni.

Governor Banwarilal Purohit chuan nimin zing khan Raj Bhavan-ah CM thar atan Stalin hi rinawmna thu tiamtirin a la lut a, a rual hian cabinet minister tur mi 33 lakluh an ni nghal bawk.

Kum 69 mi, Stalin hi CM a nih ṭum khatna tur a ni a, Tamil Nadu-a term khatna atana CM lakluh tawh zinga upa ber a ni. A pa, M Karunanidhi khan CM hi term nga a lo chelh tawh a ni. Stalin hian MLA atan ṭum sarih thlan tlin ni tawhin, Chennai Mayor-ah vawi hnih thlan tlin a ni tawh bawk a ni.

Stalin hian home ministry a chang dawn a, hei bakah hian administrative and police service, special programme leh welfare of differently abled person a enkawl bawk ang. A minister tur mi 33 te hi ṭhalai leh kum upa, tawnhriat nei tawh an inpawlh tawk hle, mahse hmeichhia erawh pahnih chauh an tel thung.

Assembly inthlan neih zawh takah khan DMK kaihhruai ṭangrual pawl hian hnehna changin, assembly seat 234 awmah seat 159 an la. DMK thawhpui zingah hian Congress party an tel. AIADMK leh a thawhpui BJP chuan seat 75 an la a ni.

Puducherry
All India NR Congress hotu N Rangasamy chu nimin khan Puducherry Union Territory chief minister atan lakluh a ni bawk. Lieutenant governor Tamilisai Soundarajan chuan Chief Minister thar hi rinawmna thu a tiam tir a, a cabinet member turte erawh lakluh tel an la ni rih lo. Assembly inthlanah hian AINRC leh BJP thawkdun chuan seat 30 awmah seat 16 an la a, AINRC hian party malin seat 10 a la.

Sorkar tharah hian kumin January thlaa Congress party aṭanga BJP zawmtu, A Namassivayam chu deputy chief minister atan dah a ni dawn nia sawi a ni.