India-ah a zawnin ni li chhung Hri kai nuai 4 chuang awm ziah

India ramah kar liam ta Inrinni khan Covid-19 hri kai thar nuai li chuang awm belh lehin, ni li chhung a zawnin hri kai thar nuai li chuang hmuh chhuah an awm thar ziah tih union health ministry chuan Pathianni khan a tarlang.

Inrinnia-a hri kai hmuh­chhuah thar hi mi 4,03,738 niin, hri vangin mi 4,092 an thih belh leh bawk. India rama hri kai hmuh chhuah tawh hi vaibelchhe 2.22 leh thihpui nuai 2.42 an awm tawh.

Hripui leng thawh hnihnain rampum a nuai mek a, hri kai mek, active case 37,36,648 awmin enkawl dam tawh hi vaibelchhe 1.83 an awm tawh a ni.

Zirtawpni khan hri kai thar 4,01,078 leh coronavirus kaihhnawih vanga thi 4,187 an awm a, Ningani khan ramchhungah hri kai thar nuai 4.14 leh thihpui 3,915 an awm thung.

State 12 zingah Maharashtra, Karnataka, Kerala, Uttar Pradesh leh Rajasthan-ah India rama hri kai mek zinga 80% an awm.

Hetih lai hian ni sarih liamta chhung khan district 180-ah hri kai thar hmuh chhuah an awm lo ve thung. Ni 14 chhungin district 18, ni 21 chhungin district 54, ni 28 chhungin district 28 ah te hri kai hmuhchhuah an awm lo.

Hri kai mek zingah dinhmun ngaihtuahawm, ICU-a enkawl lai mi 4,88,861 an awm a, ventilator hmang mi 1,70,841 leh oxygen mamawh 9,02,291 an awm thu union health minister Harsh Vardhan chuan a sawi. Inrinni thleng khan active case zinga 1.34% chu ICU ah enkawl an ni a, 0.39% chuan ventilator hmangin, 3.70% te chuan oxygen an hmang mek a ni.

Sorkar laipui chuan Covid-19 kai enkawl laite tan national policy guidelines, state leh UT-a sorkar leh private damdawi-inte an hman tur a tichhuak thar -

1. Covid-19 test-a positive kher lo te pawh Covid health facility-ah dah luh theih an ni. Hri kai nia an rinhlelh te chu suspect ward CCC, DCHC emaw DHC ah dah luh tur an ni.

2. Damlo enkawl lai chu khaw dang mi pawh hnar thiang a ni lo. Oxygen emaw damdawi an mamawh emaw angte pek vek tur an ni.

3. Damlo chuan identity card a neih loh pawhin damdawi-in chuan a lo hnar tur a ni lo.

4. An dinhmun azirin damdawi-inah admit tur an ni a, khum awl te chu a mamawh te tan chauha zuah tur a ni.

Hetih lai hian IIT Kanpur scientist te chuan May thla kar hmasa hi hri leng zual hunlai ni turin an chhut a, July thla aṭangin positive an tlakhniam tur thu an sawi. Ram chhung hmun hrang hrang dinhmun an zirna aṭangin Covid-19 hrileng thawh thumna chu October thla vela thleng thei a nih thu an sawi bawk.

Inrinni khan international medical journal The Lancet chuan India chuan Covid-19 hri leng thawh khatna a lo thunun theihna chu awmze nei loa kalpui chho lehah puhin, prime minister Narendra Modi-a kaihhruai sorkar chu a tihsual man mawh laa a chet vat a ngai a ni, a ti. India vaccination policy pawh sawiselin, The Lancet chuan central level aṭanga mumal lo, phuai taka kalpui niin a sawi a, vaccine la tawh hi India ram mipui zinga 2% pawh an la tling lo a ni, a ti.