India-in ramdang ṭanpuina ṭhahnem tak dawng tawh

Ram puma hri pui leng hluar zel avanga dam lo enkawlna tur, oxygen leh damdawi lam indaih lohna a tawh mek karah, India ram chuan ram dang aṭangin ṭanpuina ṭhahnem tak a dawn tawh.

April 27 aṭanga May 8 inkar khan oxygen concentrator 6,738, oxygen cylinder 3,856, oxygen generation plant 16 leh Remdesevir nuai 3 chu ramdang aṭangin an dawng a, hengte hi state leh UT hnenah an mamawh dan a zirin semchhuah an nih tawh tih Union Health Ministry chuan Pathianni khan a sawi.

Ram hrang hrang hnen aṭanga Covid-19 hri leng dona kawnga duhsakna an dawn chu khawvel inpumkhatna lantirtu a ni, tiin ministry chuan a sawi a ni.

Sorkar laipui chuan ṭanpuina an dawn te awlsam zawka thawnchhuah a nih theih nan ruahmanna mumal tak an duang thar a ni. Hei hian state leh UT-a medical infrastructure thuam chakna leh, Covid-19 hri kai mekte an enkawlna kawngah hmasawnna an thlen beisei a ni.

Damdawi mamawh chhawk zangkhai nana ventilator, oxygen cylinder, oxygen concentrator leh medical equipment lo thawntu, ram leh pawl hrang hrang hnenah Professor Randeep Guleria, Director AIIMS, New Delhi chuan lawmthu a sawi bawk.

Hri kai thar zat tlahniam
Pathianni khan ram pumah hr ikai thar 3,66,161 an awm belh leh, ni li chhung a zawna hri kai thar nuai li chuang zel an awm hnuah hri kai zat an tlahniam deuh.

Ni hnih chhung a zawnin hripui vanga thi mi 4,000 chuang an awm hnuah, Pathianni khan Covid-19 thihpui zat pawh hi tlahniam ve lehin, mi 3,754 in an thihpui a ni.

Ram pumah hri kai mek, active case 37,45,237 an awm a, hei hi hri kai hmuh chhuah tawh aṭanga 16.53% a tling pha. Hri kai enkawl dam tawh, recovery rate chu 82.39% a ni a, hri thihpui fatality rate chu 1.09% a ni bawk.

Hri kai thar an pun belh zel avangin state/UT 20 chuangin hri darh zel tur venna atan lockdown an puang. Delhi, Haryana leh Uttar Pradesh chuan lockdown an hman mek chu May 17 thleng atan an pawtsei. Tamil Nadu, Rajasthan leh Puducherry pawhin nimin aṭang khan kar hnih chhung atan lockdown an puang a, Karnataka pawhin May 24 thleng pawtseiin, Kerala chuan Inrinni aṭang khan ni kua chhung complete lockdown a puang bawk.