West Bengal minister thar 43 la lut

West Bengal sorkar thar minister tur Trinamool Congress MLA 43-te chu nimin khan rinawmna thu tiam tirin lakluh an ni.

May 5 khan TMC hotu Mamata Banerjee chu chief minister atan governor Jagdeep Dhankar chuan a lo la lut tawh bawk.

West Bengal assembly inthlanah khan Banerjee kaihhruai TMC hian assembly seat 292 awmah seat 213 lain, hneh taka thlan tlin an ni.

Nimina minister thar turte lakluh inkhawm hi Kolkata-a Raj Bhavan-ah neih ani a, Governor chuan rinawmna thu a tiam tir a ni. Lakluh inkhawmah hian CM Banerjee pawh a tel a, nimin tlai khan minister-te nen hian cabinet meeting hmasa ber an nei zui nghal.

Minister atana lakluh zingah hian a hriselna ṭhat tawk loh avanga assembly inthlan hnuhnung bera chuh ve lo, finance minister Amit Mitra pawh a tel. CM Banerjee chuan finance department enkawl leh tura a duh avangin Mitra hi a council minister-ah a dah tel tho a ni. By-election hmangin Mitra hi MLA-ah thlan ṭhat a ngai daw a ni.

Heti hian TMC sorkar hmasaa transport minister, Madan Mitra chu nimina lakluh zingah a tel lo a, anni bakah minister hlui pahnih Tapash Roy leh Nirmal Majhi-te pawh an tel lo bawk.