Congress-in Central Vista project tihtawp phut

Congress party chuan India ramin hri leng vanga harsatna nasa tak hmachhawn a, damlo enkawlna tur mamawh hrang hrang indaih lohna lian tak a thlen mek avangin sorkar laipui chu project hautak tak, Central Vista project thawh mek chu titawp rih turin an phut.

Eptu party chuan Central Vista project hna hrang hrang, Parliament building thar leh prime minister chenna in sak tur pawh huamin, thawh mek chu titawp rih a, he project atana sum ruahman chu ram chhunga medical facility leh infrastructure thuam chakna atana hmang zawk turin an phut tih an sawi.

Party hruaitu Rahul Gandhi chuan, "Tuipuiah mitthi ruang hmuh tur tam tak an awm a, hospital-ah thui tak tak an intlar bawk. Mipuite chu damna tur chanvo an neihte rawksak an ni. Prime minister chuan Central Vista chauh a hmuh theihna a tarmit a hlih a ngai a ni," tiin a sawi.

Gandhi chuan Covid-19 hri leng avanga dinhmun harsa tak taka awm mekte ṭanpui turin mipuite a sawm nghal a, hri leng dona tichak tura 'SpeakUpToSaveLives' campaign an siam chu zawm ṭheuh turin a ngen bawk.

"Hun khirh leh harsa tak kan tawh mekah puitu kan ngai a ni. Kan vaiin midangte nunna chhanhimna turin kan tih theih ang ti ve ang u," tiin Rahul Gandhi chuan twitter kaltlangin mipuite hnena ngenna hi a siam a ni.

Congress party chuan All India Congress Committee headquarters leh Pradesh Congress Committee office hrang hrangah ṭanpuina mamawhte tan control room an din a ni. A mamawhte hnena sem tur oxygen, khum leh damdawite an ruahman bawk.

Delhi HC-in project titawp tura ngenna ngaihtuah dawn
Delhi High Court chuan Central Vista project titawp tura petition thehluh chu vawiin hian a ngaihtuah dawn.

He petition hi Anya Malhotra leh Sohail Hashmi-te thehluh niin, Delhi leh ram pumah hri leng vanga harsatna an tawh mek avangin project lo thawh chu tihtawp rih turin a phut a, he project thawktute chu hri pu darhtu an ni thei tihte a sawi. Project hi essential service-a dah a nihna chhan tur a awm lo tih an sawi bawk. May 7 khan Supreme Court chuan Delhi High Court hnenah petition thehluh hi ngaihtuah turin a hrilh a ni.