Dan loa damdawi zawrh titawp tura hma la turin hriattir

Sorkar laipui chuan state zawng zawng hnenah dan loa damdawi zawrh leh chheprelh awm ṭhin titawp tura hma la turin a hrilh.

Covid-19 hripui len laia dan loa damdawi zuar leh chheprelhte titawp turin state tinte chu special team din tura tih an ni a, mipuiten manganna an tawh laia hetianga dik lo taka thiltite chu enliam mai mai an ni lo ang, tiin sorkar laipui chuan Supreme Court-a affidavit a thehluah a tarlang.

Apex court-a affidavit file-ah chuan Drugs Controller General of India (DGCI)-in state drugs controller (SDC) a biakpawh vek thu leh, hoarding/black marketing of drugs chu ngaihnathiamna awmloa manchhuah an nih theihna atana hma la turin a hrilh a ni, tiin sorkar chuan a sawi.

Ministry of health and family Welfare chuan state sorkarte chu black marketing/hoarding titawp a nih theihna atan Drugs and Cosmetic Act, The Essential Commodities Act leh hemi kawnga dan leh dun hman theihte chu khauh taka kengkawh turin a chah bawk.

Ram chhunga hri la len hnuah dik lo taka damdawi zawrh leh chhehrelh chungchangah hian case 157 ziah luh a ni tawh a, heng thila inhnamhnawiha puh mi ṭhenkhat pawh man a ni tawh bawk a ni.

DCGI chuan dik lo taka damdawi zawrh leh chheprelh a nih ṭhin chungchangah kawng hrang hrangin hma a la tawh ṭhin. April 10, 2021 khan dan loa Remdesivir zuartute zawn chhuah a, man an nih theihna atan special investigation drive kalpui turin SDC-te chu a hriattir a, Central Drugs Standards Control Organisation (CDSCO) chuan an hmalakna chu a bawhzui dawn tih a sawi.

Supreme court chuan April 30 khan dan loa Covid-19 damdawi leh oxygen zuar tute chu mipui pawikhawihtuah puhin a dem thu a sawi. Pawikhawih tute man chhuah a, hrem an nih ngei theihna atan special team din turin sorkar laipui chu a lo hriattir tawh bawk a ni.