Covid damdawi atan bawng ek hmang lo turin doctor-ten chah

Doctor-te chuan ram chhunga Covid-19 hri pui leng mekah, mi ṭhenkhatin hri damdawi atan bawng ek a ṭha nia an sawi ṭhin chu finfiahna awm lo a ni tih sawiin, damdawi atan bawng ek hmang lo turin an chah. Bawng ek hman hian natna hri dang a tidarh a hlauhthawnawm zawk tih an sawi.

Hindu sakhua zuitute tan bawng hi a pawimawh hle a, kum tak tak chhung chu bawng ek hi an in tihthianghlimna atana hmangin, tam tak chuan damdawi ṭangkai tak niin an ngai bawk.

Tun hnaiah mi ṭhen­khatin Covid hri dam­dawi atan bawng zun leh bawng ek a ṭha tia sawite an awm a, an thusawi lo zawmtu mi eng emaw zat an awm ṭhin bawk. Gujarat-ah pawh mi ṭhenkhat chu kar tin bawnginah kalkhawmin, an taksaah bawng zun leh ek an tat chhuak a, hei hian an taksaa natna dotu tichakin, hri lak aṭangin a veng thei niin an ngai.

India leh ram danga doctor leh scientist-te chuan Covid-19 hri kai enkawlna dang buaipui lo turin mipuite an ngen fo a, hei hian thil ṭha lo zawk a thlen thei a, an hriselna pawh a chhiat phah thei zawk tih an sawi.

Indian Medical Asso­ciation national president, Dr JA Jayalal chuan bawng zun leh bawng ek hian Covid-19 hri do turin immunity system a tichak tih finfiahna engmah a awm lo a, an ei leh inhnawihte hian an taksa hriselna tiderthawngin, ran aṭangin mihringah natna hri dang an tidarh thei zawk a ni, a ti.