India ramah Covid vangin mi 4,205 thih belh leh

India ramah Thawhlehni khan Covid-19 hri vangin mi 4,205 an thi a, nikhata hripui vanga thi an tam ber ni a ni leh. Hemi ni vek hian hri kai hmuh chhuah 3,48,421 awm belhin, India rama hri leng thawh hnihna chu khawvel ngaihven khawpin a thawk na a ni.

May 5 aṭang khan hri kai thar nuai 30 chuang chhinchhiah an ni tawh a, Health Ministry chhinchhiah danin India ramah hri vangin nuai 2.5 an thi tawh.

Hri kai mek, active case chu 37,04,099 ah kaichhoin, hri kai tawh zawng zawng chu vaibelchhe 2.33 an tling tawh a, ram pum huapa positivity rate chu 17.56% a ni.

Thawhlehni khan khan sample 19,83,804 endik a ni a,nikhata endik tam ber ṭum a ni bawk.

Sorkar data ang chuan, January 16-a India-in khawvela vaccine drive lian ber a kalpui aṭangin Thawhlehni thleng khan vaccine dose 24,46,674 semchhuah a ni tawh. Mithiamte chuan vaccine semchhuah chu duhkhawp loin, chak zawka semchhuah a nih theihna tura ṭan la turin an chah a, hetih lai hian state tam tak chuan vaccine indaihlohna vangin harsatna an tawk mek thung.

Delhi leh chhim lam state-te chuan global-tender route siam tumin ngaihtuahna an seng ṭan. Uttar Pradesh, Maharastra leh Odisha-te pawhin hei hi an thlawp thu an sawi tawh bawk a ni.

India rama Covid hri chi hrang hmuh chhuah, B.1.617 chu inkaidarh awlsam tak a nih avangin hri kai pun chakna chhan pakhatah ngaih a ni a, he variant hi India bakah ramdang 44 ah a kai hmuh chhuah an awm tawh thu World Health Organization chuan a sawi. B.1.617 hi nikum October thla khan India ramah hmuh chhuah a ni.

Hri vanga thi an pun chak avangin mitthi ruang halral leh phumna kawngah pawh harsatnate a awm chho zel a, tun hnaiah Uttar Pradesh leh Bihar inrinna bul, Ganga luiah mitthi ruang eng emaw zat paih hmuh an ni. Tualchhung mite chuan heng ruangte hi ambulance driver-ten an paih niin an sawi a, he thil hian dem leh sawisel a hlawh zui hle.