District hmun lia ṭhena hmun thumah Covid positivity rate 10% chuang vek a ni

India rama district 718 awm zinga hmun lia ṭhena hmun thumah Covid-19 hri kai awm zat, positivity rate chu 10% chung lam vek a ni.

State hrang hrangten hri darh zel tur venna atan khuahkhirhna hrang hrang siam mah se hri kai thar an la pung zel.

Indian Council of Medical Research (ICMR) hotu Dr Balram Bhargava chuan positivity rate 10% chuang awmna district-ahte chuan kar 6-8 chhung hri darh zel tur venna atana lockdown puan ṭha a tih thu a sawi. Hetih lai hian prime minister Narendra Modi kaihhruai sorkar laipui chuan ram pum huap lockdown puan chuan ram economy a nghawng thui em avangin ṭul tawpah loh chuan kalpui a tum lo tih a lo sawi tawh a, state sorkar-te kutah an state-a khuahkhirhna kalpui dan tur chu a dah a ni.

Bhargava chuan hri dona kawnga sorkar hmalakna chu sawisel lo mah se, hmalakna erawh a muang tih a sawi. April 15 khan National Task Force chuan sorkar laipui hnenah positive rate 10% leh a chunglam awmnaah lockdown puang tura rawtna a lo thlen tawh a ni, a ti.

Expert tam tak chuan India rama hri kai leh thihpui zat chu sorkarin official-a a chhinchhiah aiin a let 5-10 zeta an tam zawk an rin thu an sawi.