Vaccine lakna tur online booking ti thei lote tan Ruahmanna dang siam turin sorkar laipui hrilh

Allahabad High Court chuan sorkar laipui leh Uttar Pradesh sorkar hnenah, kum 18-45 inkar vaccine la tur, online-a in register thei lote tan ni nga chhung ngeia ruahmanna dang siamsak turin Thawhlehni khan a hrilh.

Sorkar laipui chuan kum 18-45 inkar Covid vaccine la turte chu CoWIN portal emaw, Aarogya Setu app-ah emaw in register hmasa turin a ti a ni. Mahse sorkar thupek siam chungchang hian Allahabad High Court-ah public interest litigation (PIL) thehluh a ni a, Thawhlehni khan court chuan a ngaihtuah a, kar leh Thawhṭaniah ngaihtuah chhunzawm a ni ang.

Justice Siddartha Varma leh Ajit Kumar awmna bench chuan, mi tam tak chu thingtlangah chengin, vaccine la tura registration pawh ti thei lo an awm tih an sawi. Ziak leh chhiar thiam lo, registration tih dan thiam lo pawh tam tak an awm bawk a ni tiin, sorkar laipui leh state sorkar chuan heng miten vaccine an lak ve vek theihna turin ruahmanna a siam a ngai a ni, a ti.